استغاث عدد كبير من المواطنين بوزارة الداخلية للقبض على شخص يدعي " محمد . أ" لنصبه عليهم فى عدة أشكال من خلال مركز يدعي "إدراك" لتعليم الجرافيك وأشكال أخري للنصب تحت شعار " خيمة وناسة وخيمة حكاوي".

وقال أحد المتضررين لـ "مصر تايمز" والذي حرر بلاغ بقسم مصر القديمة ضد المتهم،" الشخص ده نصاب وعليه قضايا كتير وطالع له 20 ضبط وإحضار وبينصب على الناس مرة من خلال مركز إدارك لتوظف خريجي كليات الفنون التطبيقية ومرة أخري من خلال النصب على مواطنين فى ملايين الجنيهات من خلال " خيم رمضانية".

وقال أحد المتضررين الأخرين محذرا الشباب،" السلام عليكم انا جرافيك ديزاينر, خبرة اكتر من ١٣ سنة، اشتغلت في شركات كبيرة كتير في مصر، حاليا انا برة مصر، الفترة اللي فانت اشتغلت أون لاين في مكان في مصر اسمه إدراك أكاديمي تبع القائد جروب، وكلهم تابعين لشخص واحد.. ومعاهم برضه شركة اسمها Mastermind و wanasa الشركة اشتغلت معاها 10 أيام ، طول الفترة دي كنت شغال معاه تحت ضغط رهيب، كل حاجة مستعجل فيها، لدرجة أنه كان بيطلب أصمم برزنتيشن كامل في يومين، وبالعافية بخليهم 3 أيام، كنت بشتغل 14 ساعة علشان أسلم في الديد لاين، وبالفعل كنت بسلم قبليه كمان، الكلام ده كان قبل نهاية الشهر ب 10 أيام، كنا متفقين أني هقبض حق ال 10 أيام، ومع بداية الشهر، هكون مضيت العقد بالفعل".

وتابع: "دخلنا في الشهر الجديد، وكنت باعتله آخر برزنتيشن عملناه ملف مفتوح بعد ما صمم أني أبعتهوله ملف مفتوح، تاني يوم اتفادئت إنه باعتلي قرار وقف عن العمل !! بحجة أني بتذمر، وأني مش بسلم في الديد لاين!! يمكن التذمر حصل فعلا لانه كلمني بعد ما كنت مطبق في البرزنتيشن وقاعد عليه أكتر من 15 ساعة علشان أسلمه، وبعد ما سلمته بيعدل حاجانت كنا متفقين عليها أصلا، وهتاخد وقت تاني !! وبالرغم من كده عملت التعديلات المطلوبة وبعتله الملف مفتوح!! إنما أني مش بلتزم بالديد لاين، ده كان سبب كوميدي جدا بالنسبة ليا، لأني بالفعل ماتأخرتش عن ميعاد التسليم، بالعكس سلمت قبليه وأصلا كان الوقت المحدد كان تهريج أصلا وبالرغم من كده التزمت بيه! وبعدين اكتشفت معظم الناس اللي شغالة معانا الموجودة في الجروب أصلا جديدة، والكوميدي إنها اتبعتلها نفس رسالة الوقف عن العمل تقريبا، لنفس سبب الديد لاين ده".

واستطرد: "وقتها شكيت إن الحوار كده مش طبيعي،   فعلى طول قفلت الأكسيس على تحميل الملف المفتوح للبرزنتيشن، وطلبت بكل احترام أني ماكملش شغل ويبعتلي حق ال 10 أيام اللي اشتغلتهم.. وكده كده أنا مقفل شغلي ومبعوتله PDF، والمفروض انه كان مبعوت مفتوح بس الحمد لله ماكانش حمله لسه، حسيت انه بيتهرب من دفع الفلوس، وبعديها طلب الأكسيس على الملف المفتوح، فقولتله بكل احترام برضه، يحول فلوسي وهفتح ليه الأكسيس.. لقيته غير رسالة الوقف عن العمل وضاف ليها تحذير أني لو مابعتش الملف هيتخذ معايا إجراءات إدارية!! طبعا أنا صممت على موقفي.. فخرجني خالص من جروب الشغل! وكده أنا ماخدتش حقي رسميا، مع العلم هو معاه ال PDF خلصان بعيدا عن الملف المفتوح".

وقال: "دخلت دورت بتعمق عن الشركة وعن صاحكبها، هنا اتصدمت، لقيت فيه بوستات على جروب المصممين بيتكلموا عنهم، وأنه بيعمل نفس اللي عمله معايا تقريبا، يجيب حد يشتغل معاه فترة وبعدين يتلكك ليه يمشيه منغير ما يديه حقه (كله هيبقى في الاسكرينات المرفقة) ومش بس كده الموضوع وصل للدورات التدريبية اللي بتعملها الشركة كمان، لقيت أكتر من بوست بيأكد أن دي طريقتهم، وبعد كده عرفت كمان إن معظم الي كانوا معايا في الجروب، مع اختلاف وظائفهم، برضه ماحدش خد حقه عن الفترة اللي اشتغلها معاه ومشاهم!! وكل حد فيهم كان مخلصله شغل!!
نزلت بوست عنه في إحدى صفحات التصميم، لقيته رد عليا بالرسالة الإدارية اللي أنا ذكرتها في البوست وبيهددني!! لسه كنت هرد عليه، لكن مش عارف علاقته كبيرة تقريبا، أو يعرف ناس مهمة، معرفش الحقيقة، المهم أنه خلى الصفحة تحذف البوست!!من الناس اللي كانت شغالة معايا وماخدتش حقها:

وحذر قائلا: "طبعا انا مش هستفيد حاجة وربنا يعوضني عن أيام الشغل دي  بس من الاسكرينات اللي انا هسايبها هنا، هو بيعمل كده من ٢٠٢١ ، ويمكن قبل كده كمان، ومن وقتها عمال يعمل كده مع الناس ، فحبيت احذر منه، لانه لغاية دلوقتي كل شوية يشغل ناس جديدة تعمله الشغل وبعدين يطلعلها مشكلة يمشيها ويجيب غيرها!!".