ردت الإعلامية مها الصغير علي الانتقادات التي تعرض لها إبنها ياسين السقا، بعد دوره في مسلسل سيد الناس بطولة الفنان عمرو سعد، الذي عُرض في موسم دراما رمضان 2025.

مها الصغير ترد علي منتقدي ياسين السقا في مسلسل سيد الناس

وردت مها الصغير من خلال برنامج الستات ميعرفوش يكدبوا المذاع عبر شاشة قناة سي بي سي، وقالت: “لو كان اسمه مش ياسين السقا، مكنش حد قال حاجة، هو عمل دور بسيط جدًا، ولو شفتوا الدور هتلاقوا إن ما فيهوش مساحة تمثيل كبيرة، جمل قليلة جدًا ودور صغير، فإزاي نحكم عليه كممثل؟ لكن الهجوم كان رهيب كأنه بطل المسلسل”.

وأضافت مها الصغير: “ياسين بيجسد شخصية شاب جاي من إنجلترا يعيش مع أهله في السبتية، فهو معوجش لسانه أوي، وعنده مشهد مع الفنانة بشرى بيتكلموا فيه إنجليزي، بس هي جملة واحدة مش مشهد طويل”.

وتابعت: "الهجوم الشرس عليه بحجة إنه ابن فلان وواسطة، شيء مش منطقي، لازم نكون أكثر وعيًا، فيه أبناء فنانين كتير أثبتوا نفسهم وموهبتهم زي دنيا وإيمي سمير غانم، أحمد السعدني، وأحمد الفيشاوي". 

ياسين السقا يرد علي منتقدي دوره في مسلسل سيد الناس

وفي وقت سابق، رد الفنان الشاب ياسين السقا علي هذه الانتقادات، حيث نشر بوست من خلال حسابه الرسمي عبر موقع تبادل الصور والفديوهات القصيرة "إنستجرام"، وقال:" أولًا، عايز أقول لكم عيد سعيد، ويا رب يكون خير عليكم وعلى كل حبايبكم وعلينا كلنا". 

وأضاف: "أنا كنت عايز أنشر البوست ده ليا فترة، بس كنت بفكر أكتب ايه، في ناس زعلانة من منشور نزلته، من كام يوم كده اتهاجمت عليه كتير للأسف في ناس زعلت مني واللي في بالي دول بعتذر لهم، لأن في ناس فعلًا بتنتقد باحترام حتى لو الدور مكنش كبير ومش مفهوم أوي من الجمهور أنا متقبل ده تماما وداخل المسلسل وعارف ده، وفي اللي فهم الدور واللهجة والكلام المكسر، عشان طارق طول عمره عايش في لندن". 

وتابع:"الأغلبية من الناس هما اللي فاكرين نفسهم نقاد وبيستخدموا الشتايم وبيتنمروا، ويجيبوا سيرة والدي ووالدتي بمجرد بس إن والدي أحمد السقا، وفي ناس مجرد أن ده والدي، وليه ناس مش بتحبه شخصًا لازم يشتموني ويجيبوا سيرة الأم والأب، وحتى يدعوا علي بالموت، أحب أقول للمحترمين إني بعتذر عن المنشور اللي نشرته بتاع الأسد وده مش موجه ليكم ابدًا وللحاقدين ربنا يهديكم، وأنا هنجح وهتشوفوا إن اللي خلف مامتش".