نعى الفنان محمد أنور، زميله الراحل سليمان عيد بكلمات صادقة ومؤثرة، استعاد فيها ذكريات بدايته الفنية، مؤكدًا أن الفنان الراحل كان من أوائل النجوم الذين دعموا جيله وآمنوا بموهبتهم دون أي مصلحة شخصية.

ونشر محمد أنور عبر حسابه الرسمي على موقع تبادل الصور والفيديوهات "إنستجرام" منشورًا قال فيه:"سنة 2011 عملنا مسرحية اسمها (شيزلونج) على مسرح الدولة، ومكانش حد يعرفنا غير صحابنا. عم سليمان كان أول نجم ييجي يتفرج علينا، ولما عجبناه، عزم كل المخرجين الكبار والنجوم علشان ييجوا يتفرجوا وياخدوا ناس مننا."

وأضاف أنور أن هذا الدعم كان سببًا في انطلاقتهم، قائلاً:"منهم أستاذ أشرف عبد الباقي اللي اتفرج علينا وفعلاً خدنا معاه وبدأنا المشوار."

وتابع محمد أنور كاشفًا عن الجانب الإنساني لسليمان عيد:"مش بس كده، عم سليمان كان بياخدنا يودينا شركات الإنتاج ويعرضنا على المنتجين، وهو ملوش أي مصلحة في كده... كان ممكن يتفرج ويقول كلمتين حلوين وخلاص، لكن هو كان بيعمل أكتر من كده بكتير."

وأنهى أنور رسالته قائلاً:"كان أطيب واحد شوفته في حياتي، وعمره ما زعل حد... ربنا يرحمك يا عم سليمان ويدخلك فسيح جناته."